Forcat e Armatosura të Turqisë përfunduan raundin e tyre të tretë të patrullimit në qytetin verior sirian Munbixh, si pjesë e një marrëveshjeje me Shtetet e Bashkuara të Amerikës (SHBA) për të pastruar rajonin nga organizata terroriste YPG/PKK, raporton Anadolu Agency (AA).

Sipas gazetarit të AA-së në terren, autoblindat e ushtrisë turke zhvilluan patrullimet rreth lumit Sacu në linjën mes Munbixhit dhe Jarabulusit të çliruar më herët nga terroristët përmes operacionit antiterrorist turk “Mburoja e Eufratit”.

Patrullimi i parë i ushtrisë turke është realizuar më 18 qershor, ndërsa i dyti më 20 qershor.

Marrëveshja për Munbixhin e arritur midis Turqisë dhe SHBA-së synon tërheqjen e organizatës terroriste YPG/PKK nga qyteti verior i Sirisë.

Marrëveshja u njoftua për herë të parë pas një takimi në Washington më 4 qershor midis ministrit të Jashtëm të Turqisë, Mevlut Çavusoglu dhe Sekretarit amerikan të Shtetit, Mike Pompeo.

Nëse modeli rezulton i suksesshëm, Turqia ka paralajmëruar marrëveshje të ngjashme edhe në Sirinë lindore.

Në fushatën e saj terroriste më shumë se 30-vjeçare kundër Turqisë, PKK ka shkaktuar vdekjen e rreth 40.000 njerëzve, përfshirë gra dhe fëmijë. YPG është dega siriane e PKK-së.

SHBA, e cila ka mbështetur YPG/PKK-në nën pretekstin e luftës kundër DEASH-it, i kishte garantuar Turqisë se YPG/PKK do të tërhiqej nga qyteti pas pastrimit nga DEASH-i, por një gjë të tillë nuk e kishte realizuar.

Mbi 90 për qind e popullsisë së Munbixhit përbëhet nga arabët.